Mashi-Français

Kadege ali mukenyi w’omu cishagala ciguma c’omu Ngweshe. Lusiku luguma abakazi balungu bamubwir’oko mwali Ngomora al’izimi. Ifunze. Buly’abakazi barhahab’ebyo. Kadege adosa mwali, naye Ngomora amushuza buzira kurhindira :

- K’arhali Murhemula ye wanshwekerag’omu biro byage, anampamirakwo ?

Kadege ayumv’oburhe bunene. Buly’oyu Murhemula ali mufurume munene w’e Burhinyi wakagikagera omu bishagala by’omu cihugo c’ebushi byoshi, analigwerh’omukazi mubi eyo mund’emwabo. Mukage alimanyikine oku ali ngumba na kandi mulozi bwenene. Oyo mukazi akagiyirha ngasi owamugayisagya. N’obundi, omu ago mango, omufurume ali muntu munene bwenene orhankasharhiragwakwo.

Kadege agererez’oku arhankahek’omwali eyo munda e Burhinyi, olya mukazi anamuyirha. Ahiga okulinda olusiku oyo mufurume ashigera e Ciherano, lero bashambale nka balume babirhi.

Buly’okwaba kurhayimangiba, lusiku luguma, bayishihamagala Kadege mpu olya mufurume ali omu cishagala. Honaho, agwarh’okuboko k’omwali, ahamagala mukage, boshi basharhu banayandagalir’eyo bwa biro.

Erhi bahik’oku biro bya Murhemula, buzira kudosandi, erhi bamanayulubukiramwo. Kadege ahir’omwali embere anakalihir’oyo mufurume mpu :

- Nkudwirhire mwali wani washerezize. Akola mukawe. Omuhek’aha walonza. Ci ombwire bonabuno gurhi wajira ly’onshuk’enshonyi zindi ebusu.

Murhemula, buzira kusomerwa, ayimanga, alolereza namunyere, alolereza n’ishe na nina anababwira :

- Neci nie najirag’okwo. Na mwali wawe ali mwinja ci ntankamuhek’emwani bulya mukanie anamuyirha. N’okundi, bulya mukanie arhaburha, okuburhwa kw'oyo mwana kuli kwa bulagirir'emwani.

Murhemula arhemuka, atamala bwinja, alola Kadege omu busu, anayushula ntya :

- Oku rhwajira kuli k’oku : Hano cizimbero, ngwerh’enkafu isharhu, bonabuno wanazihek’emwawe. Zaw’ezo. Oheke na mwali wawe.

Embere ciru ayus'okurerha, erhi Kadege analibirhir’embuga ajilola eciyiri. Arhimana kwobinali ezo nkafu ziyiri. Agaluk’omu biro mpu aderhe akanwa kaguma, ci Murhemula alibirhir’okuderha :

- Na kundi, hano Ngomora aburh’omwana. Akaburh’omurhabana, nakuh’ezindi nkafu irhanu n’empene zazo. Olwo lusiku lw’okuburha lwonolwo, nanabayubakir’enyumpa y’empaho aho mwawe. Erhi ankaburh’omunyere, nanaha mukawe ecikwembe ca sipere n’empene nk’isharhu. Ci kwonokwo, nayishibayubakir’enyumpa.

Muka Kadege lero adosa oyo mufurume :

- Akamomaga gurhi byanabaga ?

Kadege asinsimuka anahir’omunw’enyanya mpu :

- Akamoma, niene nayishimulerha bamuh’erind’izimi.

Ebauche préparée par Marius Nshombo

Proposez une histoire courte